Assado argentino

Nur ganz churz, das isch es foto vomene richtige Assado argentino.... wohl bekomms.......

Erste Nachricht aus Buenos Aires

Buenos Aires, 20 nov.06.

So, etz bini also scho e gueti Wuche da in Buenos Aires. Darum en chline Rückblick…..

Abschied im Les Halles….

Danke euch allne wo cho sind, es isch herrlich gsi. Ischmr no sälte soo schwer gfalle abzreise. Das isch ja aber au keis Wunder wennmr so vill soo gueti Lüt muen zrugglah. Uf jede fall weisi etz uf was dasimi chan freue bim zruggcho….

es het natürlich au es paar unbekannti gsichter gha adere party....also nume zum eis klarstelle!!!!folgendi Persone sind NÖD mini Kollege, ich känn die nöd..kei ahnig was die det gmacht hend, und falls die euch belästiget hend, tuet mier das sehrsehr leid!!!!

Vo de Reis sälber gits leider nöd allzu vill z`brichte. Ihr kännets ja, Pass zeige, irgendwo aastah für irgendwas und alles isch chli unreal, vor allem denn i dene Flugzüg womr eigentlich am liebschte allei wür sii, aber de Nachber fasch ufem Schoss het, und mer mit 800 stundekilometer fahrt, ich mein flügt… Es chlises, wenn au nume es chliises Highlight isch de neui Terminal in Madrid. Rächt schöne Bau.

Na ja. Denn in Jumbo richtig Tierra sagrada. Chum aacho wider aastah, Pass zeige, ines ernsts Beamtegsicht lächle…si, si solamente de Turismo, si señor…. Polizischte alüge isch ja no nie es Problem gsi….. Und denn use in Früehlig vo Buenos Aires. Netterwiis het mich det d`Nadine, e Ethnostudentin us Züri und sehr e liebi Person wie sich no usestelle wird, abgholt und für die erschte Täg i ihrem Dehei wohne laa… da es foti vo de nadine und ihrere Mitbewohnerin de Jessy

Bueno und denn über Beziehige ide Schwiiz hani mini chlini Wohnig gfunde. Chli, aber mit em nötigste usgstattet.

Vo dere basis us hani denn langsam min Barrio (Almagro) uskundschaftet und mich langsam mit dere riiiesige Stadt Buenos Aires agfründet. De Barrio isch eigentlich rächt zentral, muss nur es paar blocks oder blöcks oder ebe cuadras laufe zum a eini vo de 2 Metrolinie ide nöchi z`cho. Usserdem hets innerhalb vo 2 blocks, oder blöcks und cuadras fascht alles womr so brucht zum da läbe.

Buenos Aires isch gross, grösser und gegenüber Züri MONSTRÖS-RIESIG.

S`git adi 300 Buslinie, e Metro und Strasse wo breiter als d`A1 am Baregg sind (Buenos Aires en traum für jedes Mitglied vo de Ex-auto-partei….jajaja). Mit so vill Buslinie isches denn au nöd grad liecht de richtig Bus wo au no die richtig Richtig fahrt uszwähle und denn au no am richtige Ort uszstiege…. Aber glücklicherwiis sind immer es paar fründlichi und hilfsbereiti Buenos-Aires-Iigebohreni zur Stell, wo am arme Vitus denn hälfed.

Inzwüsche bini au scho mal ade Uni vo Buenos Aires gsi, de sogenannte UBA.

Det sind würklich alles linke Zeckene (wimr bi eus ide SVP seit) und de ganze Bau isch mit politische Propagandaschrifte über Kommunismuss, Fidel Castro, Hugo Chavez, Arbeiter aller Länder vereinigt euch, Sozialimus now, Gegen die Regierung, un mundo diferente es possible, vamos pueblo carrajo etc. „verschandlet“ (uiuiui hani min schwizr pass no ide hosetäsche, oder hetmr en amend no eine vo dene roooote klaut, und schickt en denn uf Kuba zu dene terrorrorisienrende Lüt det une??????....ah nei er isch no da…….).

Also sooooo öpis gäbts denn bi eus dhei nöd. Also neineinei….ich meine….die Wänd….das bringtmr ja nie meh abe das Züg….und studiere idem Chaos…..ich meine….isch ja nöd mögli so öpis…….. gits denn det kein Huuusmeister???....oder en Mörgeli wo mit dem ganze Plunder ufruuumt???….also ich mein…..het denne denn niemert gseit das d`sowjetunion zämebroche und de Blocher Bundesrat worde isch????...läckdumir…..so öpis….voll politischundso die Studente…….gitsjanöd so öpis….voll d`utopiste undso………eigentlich no ganz sympathisch die langhaarige vollbärtige Studentinne….eifach nöd so min Still…also ich meine die bärtige studentinne….schusch scho…dochdoch…ganz nett…..und links natürlich…..vo dem her…..chumi denn widr mal zrugg….isch sicher es riiise fäscht……dänn wenn de komunismus gsiegt het…..wahrschindli nach 10 Rundene nach Punkte…..na ja au egal….uf jedefall ganz andersch als bi eus……aber au nu guet….eifach andersch…..jaja….

Jänu, hanimr gseit und bin zu de sozialanthropologe go Kontaktadresse abhole….. Herrlichi Erfahrig die Uni….

Ja und denn irgendwenn simr natürlich au no in Usgang Eimal simmr dick go ässe (Barrio San Telmo, Defensa). Unglaublich das Fleisch da, wo si der uf de teller hauet….me chönt de ganzi Kanton Appezell (Innerroden) demit 2 täg lang ernähre…und Butterzart…..en himmlische Gnuss so öpis. Vo dene Portione chönteds sich im Les Halles emal e Schibe abschnide du….sägs denn am christoph weni heichum.

Und denn hani kollege vo de Nadine känneglernt, ganzganzganz liebi lüt, würklich wunderbar…und alles Musiker…ich mein Jazzmusiker….und sympathisch….und so luschtig….wie dihei….also fascht…

Ja und mit dene simmr natürlich denn ine Bar …..id Bar del tiempo (Barrio San Telmo, Estadod Unidos y Bolivar), e Jazzbar….wunderbar. und jede Sunntig abig hends e Jamsession, sehr gedige, würklich sehr schön det. Ja und hend eus vernünftig eine inetrunke oder abeglehrt. S`Quillmes, s`lokalbier, isch au rächt guet, aber en vernünftige Rum-du verreckte tüfel- findsch da also nöd… e puurluteri katastrophe…voher gross eine uf solidarität mit em Fidel und allne Cubanos mache, aber kein Havanna Club hinder de trese???? Na ja, Gottes Wege sind unergründlich…..hoffe nume de Herrgott git am Chasperiñho d`igebig mir e Buddle mitzbringe….oder e Fläsche vo Tequilla Olmeca usem Les Halles….läck wäär da schöön…. Und die Musiker hend würklich eine druff.. Extrem guet.

Beweg mich also da in andere Gefilde als in Züri…jawohl… Aber öpis stört mi ja scho da in Buenos Aires, also ich mein das mit em Rum isch ja nachem 6te Glass Bier vergange und vergässe, aber dasmr die Stadt Buenos Aires nüme dörf die Beize rauche, dass vergisstmr nöd so schnell. S`wär fascht en Grund zum uswandere….so uf Uruguay oder so….ich mein…wie söllmr sich au vernünftig betrinke, ohni debii en Sack Ziggis z`rauche???? Das händs nämlich widr nöd bedenkt, die Herre Gsetzmacher…. Das isch doch de Tod für jedi Gaschtwirtschaft….Ich mein die bahnhöf..oke…keis problem, aber die Beitze????? Da dräht sich doch de Winston Churchill im Grab ume…..Und de Che erscht rächt… Na ja, jetzt muessmr halt immer vor d`Chnelle use go rauche…

De Schock muess verdaut werde……..hasta luego……

` PS: hoffe mit de ziit wird mis Layout no besser, aber im moment hani grad d`schnurre voll und will hei.....

So erster Versuch

Hallo meine Lieben, und weniger Geliebte, Anstelle der lästigen Massenmails, welche euch die Mailbox verstopfen und meist nur Nonsens oder langweilige Berichte entalten und dabei die meisten der Empfänger nicht interessieren, mache ich zu meinem Argentina-Aufenthalt einen Blogg...... YEAHHH... so dies erst mal als Versuch... die erste Aktualisation folgt in Kürze