Summrziit

Genossen, s`isch widr mal ziit, zum euch chli was vom summer z`verzelle. Weiss doch weli schwere Ziite ihr gad ide chalte Winterziit duremached. Hoffe ihr lönd eu vom Schneetribe und vom graue Stadthimmel nöd underkriege!!! Han natürlich liecht rede da im Summr!! Also isch gad rächt was abgange ide letschte Ziit. Einersits isch bi eus im Huus e neui Mitbewohnerinn izoge, nähmlich d`Nikolina. Züricherin und au Ethnostudentin, und denn isch no d`Sophie, e dütschi us de Ferie heicho..... D`sophie isch n rächte chaotin und erinneret mich mit ihrem Widerwille gäges Abwäsche anen gwüsse Mitbewohner vo mier....glaub Angelo isch sin name (hehehehe).... Na ja uf jede fall isch d`niko under de Wuche ide Villa(=armeviertel) und leidr nume am Wucheend da. Aber über sie hani de Sergio und de Gerardo känneglernt. 2 Personajes sondergliche, beidi sit rund 20 Jahr am mit Strassechinder schaffe. Die chönd stundelang Gschichte verzelle s isch abartig. Mit ihne bini denn au zum erste mal i mim lebe ane Peña, das isch sozäge en Folkloreabig. Na ja gsehns vor mir wie euch d`Nackehaar z^berg stönd wenr das Wort Folkloreabig läsed.... Aber das isch nüt mit Stange, Handörgeli und Villiger Kiel... nüt mit chlefele, Trachte und komische Käeutz.... Nei nei da isch das Openair, vill Jungi und e Liveband (meistens Gitarre, evt. Bass und chli Perkussion). Denn werdet traditionelli Tänz wie chacarera, samba etc ufgspillt und mr tanzt in 2er päärli. Total ungezwungeni Atmosphäre, echt zimlich kuul das..jajaja... uf jede fall hetsmr besser gfalle als d`pardys ide Boliches (=discos) vo buenos aires.... Und ich Bewegigstalent han mit Hilfe vonere hübsche Junge Dame die Tänz natürlich scnell glernt (na ja meh oder weniger zumindest). S`isch ja au wiiitume bekannt das mier Bündner halt s`tanze und de Rythmus im Bluet hend...... Sind rächt witzigi Tänz das... Mer tanzt zwar z`zweite aber de stil isch so: Mer tanzt sich so chli Balzmässig immer widr aa, chunt sich nöcher und enfernt sich denn widr. alles nach allerstrengste Regle...jajaja... rächt witzig. Nebed de Peña het mir de Sergio au no s`St. Catalina vorgstellt, es Zentrum für Strassechind, wo er und de Gerardo vor 20 Jahr ufbaut hend. Inzwüsche bini scho 3 mal det verbigange und ab näxscht Wuche fangi zimli sicher det a schaffe....ändlich.... Au det schaffet so liebi lüüt.. Schrib denn no meh devo, wenis mal chli besser känne... So un zu Abschluss vom hütige Blogg, wili mal no churz säge wie fescht i eu ja all vermisse. Summr und so isch ja oke, aber ohni mini liebste Lüt halt nume halb so warm und halb so schön.... Freumi widr mit eu chöne es Bierli z`trinke oder es Jointli z`rauche, eis z`jasse, eis z`hänge, es hockey z`spile und d`zgwünne, im siono eis go käffele, im xenix mir d`kante z`geh, es paar argauer uszlache..... ja sovill sache womr in Buenosaires mängisch nur sehr schwer chan mache..... na ja bin ja bald widr bi eu, und wird denn widr alles andere als das wele...... So no es paar fötelis zum Abschluss.....

Frohes neues Jahr

so, endlich schaffis euch allne zum 4te advent, zum heilig abig, zu w`nachte, em stefanstag zum silvester z`gratuliere und eus es guets neus jahr z`wünsche. sit mim letschte iitrag isch doch so einiges passiert. s`wichtigscht, ich han e neui wohnig. da es paar iidrück Das womr da gseht, isch mis neue Zimmer und de patio vom Huus wo au grad Wohn- und Esszimmer isch. Das nomal es foto vom Patio und de einte vo eusne 2 Chatze. Ich wohne jetzt also neu im Barrio San Telmo. San Telmo isch chli es "Altstadtviertel" vo Buenos Aires, und zimlich beliebt bi künstler und usländer. Es git da zimlich vill schöni Bars, Restis, und Läde, und wäg de engere Gasse als schusch, isch de Verkehr nöd ganz so schlimm. Au sind d`Hüüser im allgemeine vill üfer baut, was es guets Feeling erzügt. Näbed dem Umzug isch aber au schusch vill passiert. Es isch d`Anna en Monet da gsi und het bi mier gläbt, damiti mich nöd so elei gfühlt han. Über sie hemr denn rege Kontakt mit ere WG in San Telmo mit ihrne Bewohner de Franzika, nati, Hannah und em Marco ufgnoh, und vor luuter Trinke, Choche und Fäschte isch de November schnell verbii. Näbedbii gits sicher no de Tato z`erwähne, er sines Zeiche Tango-guitarrist und inzwüsche zumene guete Fründ worde. Leider gaht er no die Wuche nach Uruguay go schaffe und wird eus bis im Februar oder März da abhande cho. Mit de Anna hani denn au mini erschti kulturelli Undernehmig gmacht. Mier sind zäme ane Kunstustellig gange wo eus vo de Art her a die diesjährig Ustellig vo de Kunsti ide Toni erinneret het. Leider isch die Ustellig nöd ganz ad Qualität vo ihrem zürcher Pendant anecho. Ich meine sone Installation wo Vögel id Schiebe flüged isch natürlich au sehr sehr sehr schwer z`egalisiere.... da es paar föteli Über Silverster bin ich denn zu mim Cousin und sinere Frau nach Montevideo gange. Leider gits vo det kei Fotis, weli d`Kamera vergässe han. Aber gfalle hetsmr allso soehr guet, isch wie Ferie ufem Land gsi, well Montevideo im Verglich zu Buenos Aires eifach sehr chli isch. Mit ihne hemr eigentlich täglich Fründe vo ihne empfange oder sind selber bi Fünde iiglade gsi. Sehr agnehmi Ziit gsi und vill interessanti Lüt känneglernt. So etz isch widrmal nueg Ziit ufgwändet für Blogg. Vermisse eu all, aber bald chömed ja zumindescht zwei vo mine allerliebschte Lüt mich go bsueche, das wird denn erscht richtig Party geh wenn d`Salome und de Kaspariñho da uftauchet, huiuiui. Also liebi Fründe, wennr mich mal wend privat kontaktiere, denn machedr das a beschte über skype: vitusalem (gäll Andrew). Liebschti Grüess us em Summer.